ԱՅՍՕՐ ԲՈՒՆ ԲԱՐԵԿԵՆԴԱՆ Է
Բարեկենդան է կոչվում շաբաթապահքերի և Մեծ պահքի նախընթաց օրը: Բարեկենդան բառացի նշանակում է կենդանություն, բարի կյանք: Մեծ պահքի բարեկենդանը կոչվում է Բուն Բարեկենդան, քանի որ նախորդում է ամենաերկար պահքին:
Բարեկենդանի հաջորդ օրվանից սկսվում է Մեծ պահքը, որը տևում է 48 օր՝ Բուն Բարեկենդանից մինչև Ս. Հարության՝ Զատիկի տոնը: Պահքի շրջանում օգտագործում են բացառապես բուսական ծագում ունեցող սննդամթերք: Պահքի ընթացքում հրաժարվում են ոչ միայն որոշակի կերակուրներից, այլև վատ սովորություններից, շատախոսությունից, ստախոսությունից, հայհոյանքից, զրպարտությունից, նախանձից, չարախոսությունից և այլ մեղքերից:
Մեծ Պահքն ունի յոթ կիրակի՝
• Բուն բարեկենդան
• Արտաքսում
• Անառակի
• Տնտեսի
• Դատավորի
• Գալստյան
• Ծաղկազարդ
Մեծ Պահքի շրջանում արգելված են պսակադրությունները և մատաղը: Սակայն Վազգեն Ա կաթողիկոսի շրջաբերականով թույլատրվեց պսակադրություն կատարել Մեծ Պահքի օրերին, բացառությամբ Ավագ շաբաթվա: